انور شعور
انور شعور | |
---|---|
معلومات شخصیت | |
پیدائش | 11 اپریل 1943ء (81 سال) سیونی، مدھیہ پردیش ، برطانوی ہند |
شہریت | ![]() |
عملی زندگی | |
پیشہ | شاعر |
پیشہ ورانہ زبان | اردو |
شعبۂ عمل | غزل ، قطعہ |
ملازمت | اخبار جہاں |
اعزازات | |
![]() | |
درستی - ترمیم ![]() |
انور شعور (پیدائش: 11 اپریل، 1943ء) پاکستان سے تعلق رکھنے والے اردو زبان کے مشہور و معروف شاعر ہیں۔
حالات زندگی[ترمیم]
انور شعور 11 اپریل، 1943ء کو سیونی، برطانوی ہندوستان میں اشفاق حسین خاں کے گھر پیدا ہوئے۔[1][2] تقسیم ہند کے فوراً بعد ان کے اہل خاندان کراچی منتقل ہو گئے۔ پہلے انجمن ترقی اردو پاکستان اور پھر اخبار جہاں سے وابستہ رہے۔ بعد ازاں سب رنگ کراچی سے متعلق رہے۔ آج کل روزنامہ جنگ میں ایک قطعہ روز لکھتے ہیں۔ ان کا کلام فنون، سویرا اور دوسرے رسائل میں شائع ہوتا رہتا ہے۔[2]
ادبی خدمات[ترمیم]
انور شعور دور جدید کے معتبر شاعر ہیں۔ عام فہم اور سادہ شاعری کرنے کی وجہ سے ان کو سہلِ ممتنع کا شاعر سمجھا جانے لگا ہے۔ چھوٹی بحروں میں ان کے کئی ایک اشعار زبان زدِ عام ہیں۔ انور شعور جدید غزل کے نمائندہ شعرا میں شمار ہوتے ہیں، جبکہ قطعہ نگاری بھی ان کی شہرت کا ایک بنیادی حوالہ ہے۔ ان کی شاعری میں شریک موضوعات انتہائی حساس نوعیت کے ہیں، جو انسان کے داخلی اور خارجی معاملات سے مکالمہ کرتے ہیں۔ رومانویت اور جمالیات کے نقوش ان کی شاعری میں واضح طور پر محسوس کیے جا سکتے ہیں۔ آدمی، طلسم، انتظار، دھوکا، جستجو، شراب، شام، رات، غم، تلاش، زہر، صحبت، ہمدم، زنداں، صیاد، بدن، حیرت، سفر، مشقت جیسے موضوعات کی گہرائی سے ان کی شاعری لبریز ہے۔[3]
انور شعور دھیمے لہجے کے مالک ہیں، ان کی شاعری میں مدہوشی کی کیفیت اپنی سرمستی سے مہک رہی ہوتی ہے۔ غزل کے رومان پرور شاعر ہونے کے باوجود ان کی ایک جداگانہ شناخت قطعہ نگاری بھی ہے۔ زندگی کے روزمرہ کے موضوعات کو ایک قطعہ میں سمو دینے کا ہنر انھیں خوب خوب آتا ہے۔ یہ سماج اور شعر کے درمیان ایک مستند مقام پر فائز ہیں، یہ مرتبہ ہر ایک شاعر کے حصے میں نہیں آتا، لیکن انور شعور نے اپنی لگن اور سچائی سے اس کٹھن منزل کو حاصل کیا ہے۔ ان کے چھوٹی بحروں کے اشعار بہت مقبول ہیں، یہ اپنی ذات کی طرح شاعری میں بھی کھلی کتاب کی مانند ہیں۔[3]
کراچی سے 2015ء میں انور شعور کی کلیاتِ انور شعور شائع ہوئی، جس کو رنگ ادب پبلی کیشنز نے شائع کیا۔ ا س کلیات میں ان کے چار مجموعہ ہائے کلام اندوختہ، مشق سُخن، می رقصم اور دل کا کیا رنگ کروں شامل ہیں۔[3]
تصانیف[ترمیم]
- اندوختہ
- مشق سخن
- می رقصم
- دل کا کیا رنگ کروں
- کلیاتِ انور شعور
نمونۂ کلام[ترمیم]
غزل
اتفاق اپنی جگہ خوش قسمتی اپنی جگہ | خود بناتا ہے جہاں میں آدمی اپنی جگہ | |
کہہ تو سکتا ہوں مگر مجبور کر سکتا نہیں | اختیار اپنی جگہ ہے بے بسی اپنی جگہ | |
کچھ نہ کچھ سچائی ہوتی ہے نہاں ہر بات میں | کہنے والے ٹھیک کہتے ہیں سبھی اپنی جگہ | |
صرف اس کے ہونٹ کاغذ پر بنا دیتا ہوں میں | خود بنا لیتی ہے ہونٹوں پر ہنسی اپنی جگہ | |
دوست کہتا ہوں تمہیں شاعر نہیں کہتا شعورؔ | دوستی اپنی جگہ ہے شاعری اپنی جگہ[4] |
شعر
اچھا خاصا بیٹھے بیٹھے گم ہو جاتا ہوں | اب میں اکثر میں نہیں رہتا تم ہو جاتا ہوں[5] |
غزل
یہ خود کو دیکھتے رہنے کی ہے جو خُو مجھ میں | چُھپا ہوا ہے کہیں وہ شگفتہ رو مجھ میں | |
مہ و نجوم کو تیری جبیں سے نسبت دوں | اب اس قدر بھی نہیں عادتِ غُلو مجھ میں | |
تغیراتِ جہاں دل پہ کیا اثر کرتے | ہے تیری اب بھی وہی شکل ہو بہو مجھ میں | |
رفو گروں نے عجب طبع آزمائی کی | رہی سرے سے نہ گُنجائشِ رفو مجھ میں | |
وہ جس کے سامنے میری زباں نہیں کھلتی | اُسی کے ساتھ تو ہوتی ہے گفتگو مجھ میں | |
خُدا کرے کہ اُسے دل کا راستہ مل جائے | بھٹک رہی ہے کوئی چاپ کُو بہ کُو مجھ میں | |
نہیں پسند مجھے شعر و شاعری کرنا | کبھی کبھار بس اُٹھتی ہے ایک ہُو مجھ میں | |
میں زندگی ہوں مجھے اس قدر نہ چاہ شعور | مسافرانہ اقامت گزیں ہے تو مجھ میں[6] |
حوالہ جات[ترمیم]
- ↑ انور شعور، بائیو ببلگرافی ڈاٹ کام، پاکستان
- ^ ا ب تعارف: انور شعور، ریختہ ڈاٹ او آر جی، بھارت
- ^ ا ب پ عہد حاضر کے جدید اردو غزل کے والی، خرم سہیل، ڈان نیوز ٹی وی، 23 جولائی 2015ء
- ↑ اتفاق اپنی جگہ خوش قسمتی اپنی جگہ (غزل)، انور شعور، ریختہ ڈاٹ او آر جی، بھارت
- ↑ اشعار، انور شعور،ریختہ ڈاٹ او آر جی، بھارت
- ↑ یہ خود کو دیکھتے رہنے کی ہے جو خُو مجھ میں (غزل)، انور شعور، اردو ویب، پاکستان